एमएक्स प्लेयर वरील लोकप्रिय मराठी वेब-सिरीज समांतरच्या दुसऱ्या सीजनचा टीजर उत्कंठा आणि उत्सुकता उत्पन्न करणारा आहे.
पहिल्या सीजनचा शेवट एका टेकडीच्या टोकावर होतो, जिथे सुदर्शन चक्रपाणी (नितीश भारद्वाज) कुमार महाजन (स्वप्नील जोशी) ह्याला एका गूढ महिलेबद्दल सूचना करतो.
टीजरमध्ये महिलेबद्दल काहीही सांगण्यात आले नसले तरी महाजनसाठी पुढचा प्रवास आणखी कठीण असेल याची पूर्वसूचना मिळते. आपल्या नशिबाशी भांडूनसुद्धा महाजनला चक्रपाणीच्याच मार्गाने जावं लागतंय. टीजरमध्ये महाजनला पोलीस पकडतात, असेही दाखवण्यात आले आहे. याचा अर्थ त्याला भयंकर परिणामांना सामोरं जावं लागणार आहे, हे निश्चित.
हि वेब-सिरीज सुहास शिरवळकर यांच्या समांतर या कादंबरीवर आधारित आहे. जोशीसमवेत तेजस्विनी पंडित महाजनच्या पत्नीच्या भूमिकेत आहेत. सिनेस्तानशी बोलताना पंडित यांनी सांगितले होते कि दुसऱ्या सीजनमध्ये त्यांची महत्वपूर्ण भूमिका आहे.
दुसऱ्या सीजनमध्ये दिग्दर्शकीय सूत्र सतीश राजवाडे यांच्याकडून समीर विद्वांस यांच्याकडे आले आहे. ट्रेलर २१ जूनला प्रदर्शित होतोय. टीजर येथे पहा आणि आम्हाला सांगा, हि वेब-सिरीज पाहण्यासाठी तुम्ही उत्सुक आहात का?