वैभव तत्ववादी, पूजा सावंत पुन्हा एकदा भेटली ती पुन्हा २ मध्ये एकत्र

भेटली तू पुन्हा (२०१७) चित्रपटाच्या निर्मात्यांनी आता भेटली ती पुन्हा २ या नावाने सिक्वलची घोषणा केली आहे. पहिल्या चित्रपटाची जोडी वैभव तत्ववादी आणि पूजा सावंत या चित्रपटात सुद्धा मुख्य भूमिकेत दिसणार आहेत.

पहिला चित्रपट चार वर्षांपूर्वी २८ जुलैला प्रदर्शित झाला होता.

भेटली तू पुन्हाचे दिग्दर्शन चंद्रकांत कणसे यांनी केले होते. मात्र सिक्वलचे दिग्दर्शन जयंत पवार करत आहेत. पवार मराठी मालिका विश्वात दिग्दर्शक म्हणून प्रसिद्ध आहेत. रवी जाधव यांच्या टाईमपास २ (२०१५) मध्ये त्यांनी साहाय्यक दिग्दर्शक म्हणून काम पहिले होते.

पहिल्या चित्रपटाचे लेखक संजय जामखंडी हेच या सिक्वलचा देखील स्क्रीनप्ले लिहिणार आहेत.

आपल्या निवेदनात तत्ववादींनी सांगितले, "मला खूप आनंद होतोय कि आम्ही या चित्रपटाचा सिक्वल करण्याचा निर्णय घेतलाय. पूजा सावंत आणि दिग्दर्शक जयंत पवार यांच्यासोबत काम करण्यास मी उत्सुक आहे."

भेटली तू पुन्हाची कथा आलोक (तत्ववादी) या तरुणाभोवती गुंफण्यात आली होती. आलोक त्याला पारंपारिक वाटणाऱ्या अश्विनीला लग्नासाठी नकार देतो. पण जेव्हा तो गोव्यासाठी ट्रेनने प्रवास करतो, तेव्हा योगायोगाने अश्विनी (सावंत) त्याची सहप्रवासी असते. या प्रवासात आलोकला ती आवडायला लागते.

सिक्वलमध्ये हि गोष्ट पुढे सरकेल कि अगदी नवीन गोष्ट बघायला मिळेल याबाबत निर्मात्यांनी कुठलीही स्पष्टता दिलेली नाही.